U12ko hauteskundeetan posta bidez zein EAEtik kanpo botoa emateko epea luzatu dute

Uztailaren 12an egingo diren Eusko Legebiltzarrerako hauteskundeetan posta bidezko botoa emateko epea uztailaren 10era arte luzatzea erabaki du Hauteskunde Batzorde Zentralak (HBZ). Horrez gain, ekainaren 16ra arte luzatu du Euskal Autonomia Erkidegotik (EAE) kanpo modu finkoan bizi diren hautesleek edo aldi baterako atzerrian daudenek botoa emateko eskaera egiteko epea.

Asteazken honetan onartutako ebazpenean, Correosek egindako eskaera aztertu ondoren, posta bidezko botoa emateko epea uztailaren 10era arte luzatzea erabaki du HBZk. Dena dela, bulegoak ohiko ordutegietan egongo dira irekita, 14:00ak arte.

Ildo horretatik, HBZk "arreta handiz" jarduteko eskatu dio Correosi, posta bidez jasotako boto guztiak bozketaren egunean dagokien bozketa-mahaietara eraman ahal izateko, legez ezarritako epean. Halaber, posta bidez edota atzerritik botoa emateko epea luzatzeko erabakiaren berri emateko eskatu dio. Izan ere, Euskal Autonomia Erkidegotik (EAE) kanpo modu finkoan bizi diren hautesleek edo aldi baterako atzerrian daudenek U12ko hauteskundeetan botoa emateko eskaera egiteko epea ekainaren 16ra arte luzatu du HBZk.

Testuinguru horretan, EAEtik kanpo daudenek uztailaren 11ra arte (larunbata) izango dute posta bidezko botoa emateko aukera, eta uztailaren 12ko 20:00ak arte (igandea) kontsulatuetako hautetsontzietara bidaltzeko aukera.

"Probintziako Hauteskunde Batzordeek (EAEn eta Galizian egun berean egingo dira hauteskundeak) baliozkotzat jo beharko dituzte bozkatzeko eskaera eginda zuten hautesleek kontsuletxeetako bulegoetara beranduenez uztailaren 11n bidalitako posta bidezko botoak", adierazi du HBZk.

Adineko pertsonei, gaixoei edo prebentziozko isolamendu-egoeran daudenei dagokienez, HBZk esan du ziurrenik uztailaren 2an, ezarritako epearen amaieran, boto-eskubidea bermatzeko aukera ematen duten baldintzak egongo direla. Hala ere, "pandemiaren, aurreikusitako deseskalatze faseen edo bestelako egoera berrien bilakaerak gomendatzen badu, neurri berriak hartu beharko lirateke", gaineratu du.