Jaurlaritzak eta Aldundiak bi urteko epean erabakiko dute Urdaibaiko Guggenheimari argi berdea eman edo ez

Guggenheim Bilbao Museoaren patronatuak bi urteko hausnarketa egingo du, aurten eta 2025ean, Urdaibaiko (Bizkaia) azpiegiturak aurrera jarraituko duen ala ez erabakitzeko, Iñigo Urkullu lehendakariak aurreratu duenez.

Lehendakaria Elixabete Etxanobe Bizkaiko ahaldun nagusiarekin bildu da astelehen honetan Gasteizen, proiektu bateratuak aztertzeko, batez ere Busturialdean, bertan baitago Urdaibaiko biosferaren erreserba eta museoaren azpiegitura berria egiteko asmoa.

Ondoren emandako prentsaurrekoan, lehendakariak azaldu du museoaren patronatuak "hausnarketarako denbora" nahi dutela proiektu horren inguruan. Orain arte, Bizkaiko Foru Aldundiak bultzatu du ideia, eta Eusko Jaurlaritzak, berriz, ez du berariazko babesik eman.

Urdaibain museoaren aldekoa ote den zuzenean galdetuta ere, Urkulluk erantzun du: "Ez da erraza jarrera zehatz bat izatea proiektua eta kudeaketa ezagutzen ez ditugunean".

New Yorkeko Guggenheimen zuzendaritza patronatua eta zuzendaritza aldatzeko prozesuan dago, eta ez da aurtengo ekainera arte behintzat amaituko. Lehendakariaren arabera, "ez dugu erabakirik hartu. Ikusiko dugu ideia hori posible den, asko dago hausnartzeko ", azpimarratu du.

Ahaldun nagusiak lehendakariarekin bat egin du "hausnarketa" baten beharraz, baina azaldu du, hori egiten den bitartean, erakunde bizkaitarrak "lana aurreratzeko" urratsak ematen jarraitzen duela, hala nola hirigintza-plangintzen aldaketak.

Aldaketa urbanistiko horien tramitazioan emango da, Etxanobek gaineratu duenez, inguruko hainbat kolektibok eskatzen duten herritarren parte-hartzea.

Etxanoberen arabera, "Busturialdeak Euskadiko biosferaren erreserba bakarra hartzen du eta eskualdean bizi diren 46 000 pertsonen ongizaterako irtenbideak eskainiko dituen eredu propioa eskatzen du, garapen ekonomikoaren eta aukeren sorreraren bitartez, betiere ingurumenaren jasangarritasuna ardatz izanik".

Jarduera-eremuen artean honako hauek aipatu ditu: jarduera ekonomikoa, turismo iraunkorraren garapena, dinamizazio kulturala, ur-hornidura -eskualdeak udan murrizketak izaten ditu-, saneamendua edo komunikazioak.

Miren Gorrotxategi Elkarrekin-Podemos-IUko Legebiltzarreko bozeramaileak uste du Guggenheim bat Urdaibain "proiektu antiekologikoa, beharrezkoa ez zena, zentzugabea eta jasanezina" zela, "biosfera-erreserba baten erdian, eskualdeko benetako beharretatik erabat urrun, ez zuelako inolako itzulerarik bermatzen".

Horregatik, "geldiaraztea albiste ona da Euskadirentzat. Orain erabaki zuzen bakarra behin betiko uztea da". Bozeramaile moreak adierazi duenez, aurrekontuen azken negoziazioan bere taldeak proiektua bertan behera uztea eskatu zuen, baina Eusko Jaurlaritzak "ezinezkoa zela esan zuen eta gure proposamen hau negoziatu nahi ez genuen frogatzat jarri zuen". "Gaur agerian geratzen da ezinezkoa ez izateaz gain, azkenean saihestezina izango dela", idatzi du Gorrotxategik X sare sozialean.

Guggenhein bat Urdaibain proiektu antiekologikoa zen, beharrezkoa ez zena, zentzugabea, jasanezina, biosfera-erreserba baten erdian, eskualdeko benetako beharretatik erabat urrun ez zuelako inolako itzulerarik bermatzen.

Aurrekontuen negoziazioan, proiektua bertan behera uzteko… pic.twitter.com/WCPkxRPKOg

— Miren Gorrotxategi (@MiGorrotxategi) January 22, 2024

Astelehen honetan bertan, Guggenheim Urdaibai Stop plataformak bere web orriaren bidez jakinarazi du administrazioarekiko auzi-helegitea aurkeztu duela Murueta ontziolako kostaldearen babes-zortasuna murrizten duen Ministerioaren aginduaren aurka.

Espainiako Gobernuak urriaren 19an onartu zuen gaur egun Murueta ontziola dagoen kostaldearen babes-zortasuna 100 metrotik 20ra murriztea.

Urdaibain Guggenheim museo bat jartzearen aurkako plataformak administrazioarekiko auzi-errekurtsoa jarri du Auzitegi Nazionalean agindu horren aurka, "interes orokorrentzat eta ingurumenarentzat kaltegarria" dela iritzita.

Plataforma horrek mobilizazioak antolatu ditu Urdaibain museo hori jartzearen aurka; izan ere, EAEko erakundeek Muruetan eta Gernikan egoitza bikoitz bat jartzeko asmoa zuten orain arte.