2022, serie historikoen urterik beroena, ohi baino 1,8 gradu gehiagorekin

Euskalmet Euskal Meteorologia Agentziaren arabera, 2022. urtea serie historikoetako beroena da, Euskadiko batez bestekoaren gainetik 1,8 gradurekin.

Aldi berean, bildutako euri kopuruaren arabera, 2022a oso lehorra izan da Euskadin. Zentzu horretan, Arabako Lautada nabarmentzen da, serie historikoen artean lehorrena izan baitzen bertan.

Euskalmeten datuen arabera, 2022ko batez besteko tenperaturak 16-17ºC ingurukoak izan ziren kostaldean, eta 14-15ºC ingurukoak Bizkaiko eta Gipuzkoako barnealdeko haranetan; Arabako Lautadan, berriz, 13ºC ingurukoak izan ziren, guztiak 1981-2010 aldiko batez bestekoaren gainetik.

Hain da horrela, ezen erregistrorik dagoenetik urterik beroena baita. Aipatzekoa da, gainera, serie historikoetako hamar urterik beroenetako zortzi mende honetan zehar eman direla.

2022ko portaera beroa maiatzean hasi zen eta urte osoan zehar mantendu da, bere maximoa udazkenean lortuz (serie historikoetako bigarren udazken beroena) eta, bereziki, urrian, 4 ° graduko anomalia positibo historikoa izan baitzuen, inoiz ikusi den altuena. Urtean zehar, bero-balio markak hautsi dira, bai tenperatura minimo altuengatik, bai muturreko tenperatura maximoengatik.

Intsolazioa ere urteko elementu klimatiko nabarmenetako bat izan da; izan ere, eguzki-orduak normalean baino % 10 eta % 20 gehiago izan ziren, batez ere neguan, % 35 gehiago izan baitziren.

Prezipitazioa

Prezipitazioari dagokionez, 2022. urtea oso lehorra izan zen oro har, baina aldeak izan ziren eremuen arabera. Horrela, ekialdeko kostaldean normalago jokatu zuen; Arabako Lautadan, berriz, oso lehorra da, erregistroak daudenetik lehorrena.

Prezipitazio-balio handienak, ohi bezala, Gipuzkoako ipar-ekialdean eman ziren (Eskas 2237 l/m²; Añarbe 1655 l/m²); baxuenak, ostera, Arabako hegoaldeko zenbait tokitan (Moreda 215 l/m²), eta batez bestekoaren barruan gainerako lekuetan (Arrasate 809 l/m²; Derio 796 l/m²).

Abisuak eta alertak

Eguraldi txarrari dagokionez, Eusko Jaurlaritzak 235 abisu hori, 28 alerta laranja eta 5 alarma gorri indarrean jarri zituen iaz.

Hain zuzen ere, tenperatura altuek eta haiei lotutako baso-suteak izateko arriskuak eragin zituzten alarma gorri guztiak eta abisu gehien ezartzea.