Gizartea -
Koronabirusa
80 eta 89 urte arteko pertsonen % 60 immunizatuta dago EAEn
Gainera, 70 eta 79 urte artekoen ia erdiak jaso du lehenengo dosia. Janssenen dosi bakarra eman diete 3.737 herritarri, eta guztira 191.025 dira immunizatutakoak.
agentziak | eitb media
EAEko 80 eta 89 urte arteko herritarren % 60,5 jada immunizatuta dago, covid-19aren aurkako bigarren dosia jasota, eta 70-79 adin tartean ia erdiek, % 48,5ek, jaso dute lehenengo dosia gutxienez.
Gaurdaino, covid-19aren aurkako 707.219 txerto eman dituzte Araban, Bizkaian eta Gipuzkoan, eta horietako 184.041 bigarren dosiak izan dira, hau da, immunizatutako pertsonak. Horiei gehitu behar zaizkie Janssenen dosi bakarreko sendagaia jaso dutenak eta gaixotasuna pasatzeagatik dosi bakarra jaso duten 3.247ak. Hori horrela, 191.025 dira guztira immunizatutakoak.
Txerto motaren arabera, Osasun Sailak Pfizer-BioNTechen 481.459 dosi eman ditu (172.845 bigarren dosiak eta 667 dosi bakarrak), Modernaren 43,854 (11.196 bigarren dosiarenak, eta 444 dosi bakarrak), 178.169 AstraZenecarenak (2.136 dosi bakarrak), eta 3.737, Janssenenak (dosi bakarrak).
Zentro sanitarioetako erabiltzaile eta profesional guztiek jaso dute bigarren dosia, eta Osakidetzan % 97,2koa portzentaje hori. Osasun zentro pribatuetan % 73,1ek jaso dute bigarren dosia, eta osasun garraioan 10etik 9k jaso du lehenengo dosia.
Bestalde, 55 urtetik beherako ertzain guztiek eta beste zerbitzu soziosanitario batzuetako langile guztiek jaso dute lehenengo dosia, unibertsitatetik kanpoko 55 urtetik beherako irakasle guztien moduan.
Adinaren arabera banatuta, 90 urtetik gorako guztiek eta 80 eta 89 urte arteko ia guztiek (% 99,6) jaso dute lehenengo dosia. Portzentaje hori % 48,5era jaisten da 70 urtetik 79ra artekoen kasuan, eta % 37,3ra 60 eta 69 urte artekoan.
Bigarren dosia jaso dutenak % 97,9 eta % 96 dira 100dik gorakoen eta 90etik 99 urtera artekoen artean, hurrenez hurren, eta 10etik 6 immunizatu dira 80 urtetik 89 urtera. Portzentajea % 3,8ra eta % 4,9ra jaisten da 70-79 eta 60-69 adin tarteetan, hurrenez hurren.
EAEn 768.300 txerto jaso dituzte gaur arte: 526.500 Pfizerrenak, 70.900 Modernarenak, 170.900 AstraZenecarenak, eta 6.850 Janssenenak.
Apirilaren 21etik 27ra, aurreikuspenen arabera, Pfizerren 58.408 txerto emango dituzte, Modernaren 5.555 eta AstraZenecaren 8.680 (guztira 72.643).
