Emakumeen eta gizonen arteko soldata arrakala bost puntu murriztu da 2020tik EAEn, baina % 17,9koa da oraindik

Emakumeen eta gizonen arteko soldata arrakala bost puntu murriztu da 2020tik Euskal Autonomia Erkidegoan, baina aldea % 17,9koa da oraindik; izan ere, gizonek emakumeek baino 6.000 euro gehiago irabazten dituzte urtean, batez beste. 

Idoia Mendia Eusko Jaurlaritzako bigarren lehendakariorde eta Lan eta Enpleguko sailburuak Soldata Arrakalari buruzko Nazioarteko II. Kongresuaren inaugurazioan eman ditu soldata arrakalari buruzko datuak.

Mendiaren arabera, gizonen eta emakumeen soldataren arteko aldea "oso kezkagarria" da oraindik, eta, gaineratu duenez, soldata arrakalan zeresana dute gaitasun ekonomikoak eta zaintzari eskainitako denborak.

Gizartea zahartzen ari den heinean, zaintza lanen beharra ere handituko da, eta, Mendiaren iritziz, botere publikoek "alertak piztuta" mantendu eta "tresna guztiak irauli" behar dituzte, lan egiteko adinean eta erretiratuta dauden emakumeak "atzean" ez gelditzeko.