Ane Elexpuruk 2027ra arte jarraituko du Athleticen

Athleticek eta Ane Elexpuruk akordioa lortu dute jokalariaren kontratua bi denboraldi luzatzeko, 2027ko ekainaren 30era arte, urtebete gehiago luzatzeko aukerarekin.

Jokalariarekin batera, Jon Uriarte presidentea eta Xabier Arrieta Emakumezkoen Futbol zuzendaria izan dira, astelehen honetan, Bilboko Ibaigane jauegian egin den sinadura ekitaldian.

Talde zuri-gorriak nabarmendu duenez, 21 urteko eskuin hegaleko atzelariak "errendimendu bikaina" erakutsi du, F Ligan finkatu eta David Aznar entrenatzailearentzat "funtsezko jokalaria" bilakatu arte.

Denboraldi honetan 18 aldiz hartu du parte hasierako hamaikakoan F Ligan, 1.500 minutu baino gehiago jokatu ditu, eta bi gol sartu. Ane Elexpuru kadete mailan iritsi zen Lezamara Bizkerre FT taldetik, 2018-2019 denboraldian, Loiola Indautxun aritu ostean.

Lehoi gisa 2022ko urriaren 2an egin zuen debuta, Real Madrilen aurka, Lezaman, titular gisa. Hasieran, bigarren eta lehen taldeetan jokatu zuen, baina 2023-2024 denboralditik lehen taldean dauka fitxa, eta taldean minutu gehien dituen laugarren futbolaria da.