Urkulluk ez du LABI instituzionala deituko, azterketa tekniko berri baten zain

Oraingoz, Iñigo Urkullu lehendakariak baztertu egin du Euskadiko Babes Zibileko Planaren (LABI) aholku batzordea deitzea, organo instituzionalari aholkatzen dion batzorde teknikoak ostegunean egingo duen pandemiaren bilakaeraren azterketaren zain.

Batzorde teknikoak bilera izan du astearte honetan, eta lehendakaria bera eta Gotzone Sagardui Osasun sailburua bertan izan dira, egoera epidemiologikoa "sakon" aztertzeko.

Bilera horren ostean, Eusko Jaurlaritzak agiri bat kaleratu du, jakinarazteko "oraingoz ez dagoela aurreikusita LABI instituzionala deitzea", eta covid-19aren aurka indarrean dauden neurriak betetzeko beharra azpimarratu du.

"Osasun agintarien ustea eta gomendioa argia da: neurri horiek zorrotz betetzea da bide eraginkorrena murrizketa gehiago saihesteko", jaso dute oharrean, eta datorren asteko ostegunean batzorde teknikoa berriro bilduko dela iragarri dute.

Osasun sailburuak ohartarazi du egoera "kezkagarria" dela, pandemiaren eragina "oso handia" delako, "hazten jarraitzen duelako eta azken egunetan erritmo biziagoan egiten ari delako gora", eta birusaren hedapenari eusteko prebentzio neurriak betetzeko deia egin du.

726 positibo berri atzeman dituzte azken orduetan Euskadin, eta % 7,8koa da positibo tasa. "Goranzko" joera mantenduko dela aurreikusten da, izan ere, intzidentzia % 22 igo da astebetean eta 425,15 pertsona kutsatu dira 100.000 biztanleko 14 egunean. LABI teknikoa datorren asteko ostegunean bilduko da berriro.