Donostiako Ulia mendia, ehizarik gabeko eremua

Gipuzkoako Aldizkari Ofizialak astelehen honetan argitaratu du Donostia eta Pasaia artean kokatzen den Ulia mendia ehizarik gabeko eremu izendatzen duen foru agindua.

Ohar batean, Eguzki eta Ekologistak Martxan talde ekologistek, besteak beste, azaldu dute agindu horrek ahalbidetuko duela irailaren 1ean hasiko den ehiza denboraldi berrian Ulia "azkenean tirorik gabe geratzea eta bere erabiltzaileentzako gune segurua izatea".

Kolektibo ekologistek txalotu egin dute erabaki hori, eta gogorarazi dute Aldundiak 2014an debekatu egin zuela Uliako ehiza, Donostiako eta Pasaiako udalek hala eskatuta, baina "joan den denboraldian berriro baimendu zuen, akatsak dituen Ehiza Legearen atal batean oinarritutako epai judizial baten ostean".

Ildo horretan, "akatsez betea zegoela" zegoela esan dute, "Egoera jakin batzuetan ezin delako ehiza beste edozein kontsiderazioren gainetik dagoen eskubidea izan, eta Aldundiak ere, ehizaren arloan erabateko eskumenak dituenak, ezin diolako mugarik jarri".

Joan den abenduan, Eusko Legebiltzarrak aho batez aldatu zuen atal hori, eta orain argitaratutako Foru Aginduaren bidez, "Ulia tiroz askatzen da, eta, horrela, oinarrizko baldintza bat ezartzen da erabiltzaile mota guztiek espazio horretaz modu baketsuan gozatzeko".