Greba deitu dute Bizkaiko ostalaritzan urriaren 4, 11 eta 12rako

ELA, LAB, CCOO eta UGT sindikatuek hiru greba egun deitu dituzte Bizkaiko ostalaritzan, urriaren 4, 11 eta 12rako. Sindikatuek salatu dutenez, negoziazio-mahaiak blokeatuta jarraitzen du, eta ekaineko azken grebetatik ez da mugimendurik izan Bizkaiko Ostalaritza Elkartean, "nahiz eta azken bilera otsailean izan".

"Bizkaiko Ostalaritza Elkarteak jarrera arduragabea du erabat, eta sektoreko langileak irteerarik gabeko kalezulo batera eramaten ari da. Bertan, mobilizazioa da euren aldarrikapenei erantzuteko aukera bakarra", adierazi dute sindikatuek batera egindako prentsa-ohar batean.

Mobilizazioen etapa berri hori irailaren 26an hasiko da, 11:00etatik 12: 00etara egingo den elkarreratzearekin, Bizkaiko Ostalaritza Elkartearen (Bilbon) aurrean.

Sindikatuek adierazi dute ez direla soldatak igo 2020tik, eta aldi baterako lan-erregulazioak "gure eguneroko kontua bihurtu dira" pandemiaz geroztik.

Azkenik, gogorarazi dute hitzarmen horrek kolektibitateen sektoreari ere eragiten dio. Sektore prekarizatu horretan, langile gehienak emakumeak dira, eta kontratu prekarioak eta lanaldi partzialak dituzte, baita lan karga handiak ere.

Bitartean, sindikatuen esanetan, "patronalak uko egiten dio bere hitzarmen propioa negoziatzeari, nahiz eta alderdi sozialetik bere baldintzak hobetzea eskatzen dugun, gaur egun bere beharrak eta kezkak jasotzen ez dituen hitzarmen baten borrokarekin bat eginez".

Beren ustez, sektoreko enpresek "irabazi marjinak handitu nahi dituzte, langileen sakrifizioaren kontura, eta covid-19ak sortutako faktura ordaintzeko asmoarekin jarraitzen dute. Ez dugu onartuko", gaineratu dute.