Ekonomia -
ATLANTIKOKO KORRIDOREA
Urkulluk Atlantikoko igarobideaz duen kezka helaraziko dio asteazkenean Europako Garraio komisarioari
Lehendakaria eta Alain Rousset euroeskualdeko eta Akitania Berriko presidentea Adina Valeanekin bilduko dira bihar bideokonferentzia bidez, Iberiar penintsula eta Frantziako hego-mendebaldea lotuko dituen Atlantikoko igarobidearekin lotutako aurrerapenak aztertzeko.
EITB MEDIA
Iñigo Urkullu Eusko Jaurlaritzako lehendakariak Gobernu Kontseiluari jakinarazi dio Alain Rousset Akitania Berriko presidentearekin batera bilera egingo duela bihar, asteazkena, Adina Valean Europako Garraio Komisarioarekin.
Hala adierazi du Eusko Jaurlaritzako bozeramaile Bingen Zupiriak Gobernu Kontseiluaren osteko prentsaurrekoan. Azpimarratu duenez, bilera bideokonferentzia bidez egingo dute, eta Iberiar penintsula eta Frantziako hego-mendebaldea lotuko dituen Atlantikoko korridorearekin lotutako aurrerapenak aztertzea izango ditu helburu.
Proiektu hori trantsizio ekologikoen eta energetikoen helburuen barruan dago eta 1996an sortutako Europa barneko Garraio Sarearen parte da.
Topaketa horretan lehendakariak eskatuko du Bordele-Hendaia-Gasteiz interkonexioa 2030erako garaiz eta behar bezala egitea, eta lehentasuna ematea Europako inbertsioen arteko mugaz gaindiko interkonexio horiei, Europa Barneko Garraio Sarearen (TEN-T) esparruan.
Era berean, Eusko Jaurlaritzako bozeramaileak nabarmendu duenez, Urkulluk bere kezka helaraziko dio Europako Garraio Komisarioari interkonexio horren egungo egoerari buruz, eta Burdeos-Dax lineak euskal Y-arekin lotzen duen mugaraino abiadura handiko trenaren linea berri bat eraikitzeko beharra azpimarratuko du, Europako araudian jasotako konpromisoak errespetatzeko eta elkarreragingarritasuna bermatzeko.