Lehendakariaren ustez, zorra barkatzeko akordioa ona izango da Kataluniarentzat

Iñigo Urkullu lehendakariaren ustez, Pedro Sanchezen inbestidurarako PSOEk eta ERCk egindako akordioa "ona izango da Kataluniarentzat". Akordio horrek, besteak beste, Kataluniako zorraren 15.000 milioi barkatzea biltzen du. 

Eusko Legebiltzarrera sartzean kazetariei egindako adierazpenetan, lehendakariak esan du 15.000 milioi horiek Kataluniako Generalitateak "2012tik eskatzen zuen kopurua" direla eta, bere ustez, aldarrikapen ekonomiko hori izan zela ondoren Kataluniako "proces" deiturikoa izan den guztiaren jatorria. Horregatik, akordioa "Kataluniarentzat ona" izango dela uste du.

Amnistiari buruzko lege-proiektuari buruz galdetuta, azaldu du ez duela testuaren berri, eta, beraz, ezin duela iritzirik eman, baina gogorarazi du berak beti defendatu duela "bizitza politikoa ez judizializatzea". Ildo horretan, bere iritziz, "ona litzateke 2017ko urriaren 1etik izan zen egoerari ahal den neurrian buelta ematen saiatzea".