Andoni Ortuzar: 'EH Bilduk hondamendira eraman ditu Aurrekontuak'

EH Bilduk Aurrekontuak "hondamendira eraman" dituela esan du Andoni Ortuzar EAJko Euzkadi Buru Batzarreko (EBB) presidenteak. Ortuzarren esanetan, koalizioak "bi eskatu ditu eta ezin izan dio eutsi eskuan zuenari".

Halaber, Radio Euskadiko 'Boulevard' saioan egin dioten elkarrizketan, EBBko presidenteak ziurtatu du Eusko Jaurlaritzak bere esku egon den guztia egin duela azken proposamena "muturreraino" eramanda eta EH Bilduren eskariei "ia erabateko erantzuna" emanda.

"Aurrekontuak onartu izan bagenitu, urtarriletik aurrera, pentsiodunek 50 euro gehiago kobratuko lituzkete, eta datorren urtetik aurrera 100 euro gehiago, 858 eurora iritsi arte. Orain, aldiz, ez dute irabazi gehiago izango. Hori da EH Bilduk egin duen ekarpena, Aurrekontu proposamena ez onartzeagatik", nabarmendu du.

Aurrekontuak atzeratuta, EBBko presidenteak baieztatu du jasotako "danbatekoaren" ondorioak txikiagotzen saiatuko dela Eusko Jaurlaritza. Halaber, gaineratu du EH Bilduk ez duela Estatutu berriari buruzko akordioa hitzartzerakoan izandako borondate bera erakutsi: "Bestela, Aurrekontu akordioa itxita egongo litzateke". Ildo horretan, adierazi du kontuak onartzetik oso gertu egon direla.

Horrez gain, Ortuzarrek argitu du EH Bilduko ordezkarietako batzuk Aurrekontuak babestearen alde zeudela, baina beste batzuek ez zutela halakorik nahi. "Horiek dira, hain zuzen, negoziazioa hondamendira eraman dutenak", gaineratu du.

"Ordezkarietako batzuk politikoagoak dira, hots, ikuspegi politikoagoa dute. Horregatik, akordioa erdiestearen alde agertu dira, EH Bildu jarrera orekatu batekin sistema instituzionalaren barruan sartzeko aukera ona zelako, baina ziurrenik mugimendu sindikaletako indarrek hartu dute azken erabakia, erradikalizatuago dauden horiek. Nik uste dut EH Bildu, oraindik ere, erosoago sentitzen dela pankarta atzean, arazoak konpontzen baino", nabarmendu du.