Gizartea -
Heriotza
Josu Unanue zendu da, HIESA duten pertsona elkarteen sortzaile eta ekintzaile bermeotar historikoa
Hiesak jotako pertsonak laguntzeko Txo Hiesa eta T4 elkarteen sortzailea izan zen 80ko hamarkadaren amaieran. Bizkaiko ahaldun nagusirako EH Bilduren hautagaia ere izan zen, eta 2011n koalizio subiranistako zinegotzi aukeratu zuten bere herrian, Bermeon (Bizkaia).
EITB Media
Josu Unanue, hiesak jotako pertsonak laguntzeko Euskadiko eta Espainiako Estatuko elkarteen sortzailea eta EH Bilduren Bizkaiko ahaldun nagusirako hautagaia, hil da gaur.
"Josu Unanuek utzi gaitu. Fokoetatik kanpo, pertsona langilea, konprometitua eta alaia", adierazi du EH Bilduk sare sozialetan.
Unanue, 1985etik seropositiboa, Txo Hiesa eta T4 hiesak jotakoen elkarteen fundatzailea izan zen 80ko hamarkadaren amaieran, eta mugimendu horretako ekintzaile nabarmenetako bat Espainiako Estatu osoan.
2011n EH Bilduk zinegotzi aukeratu zuen bere herrian, Bermeon (Bizkaia), eta lau urtez alkateorde eta Gizarte Ekintzako zinegotzi izan zen.
Lau urte geroago, koalizio subiranistak Bizkaiko ahaldun nagusigai aurkeztu zuen, eta legealdi horretan batzarkide izan zen.
Unanuek koipeztatzaile eta makinista gisa lan egin zuen atunontzietan Afrikako uretan, eta itsasotik alde egin zuenean lanbide heziketako irakasle izan zen, politikatik igaro aurretik.