Gizartea -
ELIKAGAIEN BANKUAK
Elikagaien Bilketa Handiak ez du boluntariorik izango eta dohaintzak onartuko ditu
Elikagaien Bankuaren ekimen solidarioaren zazpigarren edizioa 2020ko azaroaren 16tik 21era izango da.
AGENTZIAK | ERREDAKZIOA
Egungo egoerak 2020ko azaroaren 16tik 21era bitartean egingo den Elikagaien Bilketa Handia egiteko modua aldatu behar izatea eragin du. Aurten, bilketak ez du boluntariorik izango, kanpainak gehiago iraungo du eta dohaintzak onartuko ditu.
Zuhurtzia neurriak direla eta, ekimenaren zazpigarren edizioak ez du boluntariorik izango dendetan bezeroen dohaintzak bideratzeko. Kasu honetan, establezimenduetan elikagai-bonuak erosteko egunak ugarituko dira.
Bestalde, Bizkaiko Elikagaien Bankuak ez du inoiz dirurik eskatu bere helburua "Bizkaian beharra dutenei banatzeko elikagaiak biltzea" delako, baina dohaintzak onartuko ditu. Elikagaien bankuak azaldu duenez, aurten, salbuespen gisa, diruzko dohaintzak eskatu behar izan ditu, eta Bizkaiko Elikagaien Bankuaren webgunearen bidez egin ahalko dira, txartel, paypal, banku-transferentzia edo bizum bidez.
Erakundeak azaldu duenez, bere jarduera solidarioaren % 25 Bilketa Handiaren arrakastaren mende dago, eta, egungo egoeran, "gero eta premiazkoagoa eta beharrezkoagoa da".