283 positibo gehiago azken 24 orduetan Hego Euskal Herrian

199 koronabirus kasu positibo gehiago atzeman dituzte azken 24 orduetan EAEn, Eusko Jaurlaritzako Osasun Sailak ohar baten bidez zabaldu duenez. Lurraldeka, 62 kasu atzeman ziren Araban, 109 Bizkaian, 25 Gipuzkoan, eta 3 kasu Euskaditik kanpo bizi diren pertsonetan. Larunbat honetan 3.040 PCR proba egin dituzte.

Orain arte, guztira 365 PCR egin dira Bilboko Back&Stage diskotekarekin lotutako baheketa lanetan, eta 27 kasu positibo atzeman dira. Goizean zehar PCR proba gehiago egingo dira.

Ospitaleratzeak, udalerrietako kasuak eta R0 indizea, berriz, bihar eguneratuko dituzte.

84 kasu berri Nafarroan

Bestalde, Nafarroan 84 kasu berri baieztatu zituzten atzo. Ondorioz, dagoeneko 6.820 kutsatu izan dira pandemia hasi zenetik. Gainera, beste pertsona bat ospitaleratu behar izan dute, Osasun Publikoko Institutuak jakitera eman duenez.

Inor ez zen hil larunbatean koronabirusaren ondorioz, baina COVID-19ak 529 hildako utzi ditu Foru Erkidegoan.

Positiboen % 65 Iruñerrian daude, ostiralean baino bost puntu gutxiago, eta % 26 Tutera aldean.

Kutsatuek batez beste 34 urte dituzte, % 35ak 15 eta 30 urte artean ditu, % 50ak 30 eta 55 artean, eta % 8k 65 urte baino gehiago.

40 pertsona Nafarroako sare publikoko ospitaleetan daude. Horietako hiru ZIUn daude, lau etxean ospitaleraturik eta beste 33 ospitaleko geletan.

Birusa atzemateko probei dagokionez, atzo 1.447 PCR egin zituzten, eta iragan igandetik 12.244, egunean batez beste 1.500.