Martxoaren 8a lan-etenaldirik gabe eta giza eskubideen defentsan zentratuko da aurten

Mugimendu feministak aldera batera utzi ditu aurten martxoaren 8rako lanuzteak, igandea izango baita. Giza eskubideen defentsan zentratuta, "aurrean izango gaituzte, ez dira pasako!" oihukatzean oinarrituko da.

Euskal Herriko Mugimendu Feministaren esanetan, eskuin mutur "zaharkitu, misogino eta homofoboari aurre egiten dion feminismo antifaxista defendatzen jarraitzeko" deialdia egin dute.

Amaia Santesteban eta Eva Rodriguez de Luis Nafarroako M8ko mugimenduko bozeramaileek prentsaurrekoan azaldu dutenez, borroka feminista beharrezkoa da oraindik, gaur duela urtebete bezala, "horregatik joan ginen Hego Euskal Herrian urtarrilaren 30ean greba orokorrera".

Halaber, "azken bi urteetan mobilizatzeko eta antolatzeko gaitasuna erakutsi dugu greba feministetan, gizarte-mugimenduaren beste borroka batzuetarako erreferente izan direnak", azaldu dute.

2018 eta 2019ko grebek milaka emakumeren inplikazioa bultzatu dute feminismo antolatuan, eta grebaren kontzeptua bera zabaltzeko eta birdefinitzeko balio izan digu, bai eta orokorrean emakumeok egiten dugun soldatarik gabeko lan ikusezina ikustarazteko ere.

"Kaleak beteko ditugu berriro"

Aurten berriro ere kaleak beteko dituztela ohartarazi dute, eta "ozen eta argi esango dugu: jendarte eredu hau bizigaitza dela pertsona gehienontzat, batez ere emakume eta genero disidenteontzat, eta jasanezina planetarentzat".

Aurten Euskal Herrian "ez dugunez grebara deitu, gure aldetik ezintasun bat edo su-eten bat dagoela ikusarazi nahi izan dutenei" honakoa erantzun diete: "Ez bata eta ez bestea. Borroka feminista beharrezkoa da oraindik".

Greba feminista emakume langileak antolatzeko bitarteko bat gehiago dela gogoratu dute; "ez da helburu bat, beste eredu sozial eta produktibo bat salatzeko eta aldarrikatzeko tresna bat baizik, eta ahalegin eraldatzaile horretan jarraitzen dugu", azaldu dute.

Horrenbestez, "sare sozialek eragiten duten pasibotasuna gaindituz, kaleetan eta talde, kolektibo eta asanbladetako antolakuntza feministaren bidez ere presioa egin behar dugu", esan dute.

Ekitaldiak modu deszentralizatuan hasiko dira herri eta auzoetan, goizeko 12:00etan. Arratsaldean, 18:00etatik aurrera hasiko dira, mobilizazioak deitu baitituzte hainbat gunetan.

Mobilizazioak

Bilbon: 13:00etan abiatuko da mobilizazioa Jesusen Bihotzetik.

Donostian: 12:00etan mobilizazio deszentralizatuak deitu dituzte herri eta auzoetan, eta arratsaldean, 18:00etan, mobilizazio zentralizatuak.

Gasteizen: Arratsaldeko 17:30ean San Anton Plazatik aterako da manifestazioa.

Iruñean: 12:00etan mobilizazio deszentralizatuak herri eta auzoetan / Alde zaharra: Gaztelu enparantza. Arratsaldean, 18:00etan mobilizazio zentralizatuak eskualdeetan / Iruñerria: Antonutti.

Baionan: 11:00etan Pausa aurrean (18 Lesseps kaian).