AHTren Ezkioko edo Gasteizko lotunearen erabakia atzeratu egingo da Aralarko zundaketekin dauden arazoengatik

Jose Antonio Santano Estatuko Garraio eta Mugikortasun Iraunkorreko idazkariak aurreratu duenez, AHTa Nafarroarekin Ezkio-Itsasotik edo Gasteiztik lotzeko erabakia atzeratu egingo da, eta ez da datorren urtearen hasieran hartuko, Aralarren arazoak baitaude lur publiko eta pribatuetara iristeko, beharrezkoak diren zundaketak egiteko.

Astelehen honetan Irungo nazioarteko geltoki berriaren obretara egin duen bisitan kazetariei azaldu dienez, arazoak izaten ari dira, "lursailetara sartzea kostatzen ari zaigulako, publikoetara zein pribatuetara".

"Aldi baterako desjabetzeen prozedura bat ezarri behar izan dugu, eta hori martxan jarri behar dugu. Zailtasunak daude eta horrek aurrera egiteko denbora gehiago behar izatea esan nahi du", adierazi du.

Sartzeko zailtasunez gain, lanen konplexutasuna ere azpimarratu du: "200-300 metro baino gehiagoko sakoneran egin behar dira zundaketak, tunel baten balizko inpaktua eta ezaugarriak aztertu behar direlako eta horrek zailtasun handia du"

Hala, hasiera batean erabakia 2025aren hasierarako hartzea aurreikusi bazen ere, "ez da horrela izango", aurreratu du. "Luze joko du. Zundaketak egiteko behar den denbora hartuko dugu. Zaila da sarbideak hain konplexuak badira baina lortuko dugu. Mezua hori da, baina denbora behar du ", berretsi du.

Altsasutik Iruñerako ibilbideari dagokionez, Santanok esan du "oso aurreratuta" daudela, eta, adierazi duenez, "laster" izango dira berriak, "tarte hori baketsua delako, adostua dagoelako, eta, gainera, Eusko Jaurlaritzak ibilbidea hobetzeko egindako alegazio bat onartu delako, Aralar mendilerroa gutxiago inbadituz".

Zehaztu duenez, Altsasu-Iruñea "bide bakarrekoa da, eta, beraz, Europako zabalerako bide bikoitzeko plataforma bihurtu behar dugu, abiadura handikoa, hori askoz azkarrago joango da".

"Eusko Jaurlaritzaren eskutik hartu dugun erabakia denborarik ez galtzea da. Eraman dezagun aurrera Altsasu-Iruñea eta beste tartean hartu behar dugun denbora guztia hartuko dugu, zundaketak egin behar ditugulako", berretsi du.