4.125 pertsona gehiago langabeziaren zerrendetan urtarrilean, eta 141.892 langabe guztira Hego Euskal Herrian

2024ko lehen hilabetean, 4.125 pertsona gehiago zenbatu dituzte langabeziaren zerrendetan, eta 141.892 langabe guztira, Hego Euskal Herrian.

Urtarrilean, 3.450 langabe gehiago zenbatu dituzte Euskadin, abenduan baino % 3,20 gehiago, guztira 111.229 zenbatu baitituzte, Lanbide Euskal Enplegu Zerbitzuak emandako datuen arabera. Nafarroan ere, 675 langabe gehiago zenbatu dituzte, aurreko hilean baino % 2,25 gehiago.

Hala ere, duela urtebete, 2023ko urtarrilean, 1.676 langabe gehiago zeuden EAEn, eta 2009tik urtarrilean erregistratutako langabeen kopururik txikiena da.

Gainera, kontratazioa % 9,81 hazi da aurreko hilabetekoarekin alderatuta, eta % 6,5 iazko urtarrilekoarekin alderatuta.

Azken hilabetean, 59.751 kontratu berri sinatu dira, eta lautik bat (% 25,1) mugagabeak izan dira.

Araban bakarrik jaitsi da langabezia urtarrilean abendukoarekin alderatuta, 132 langabe gutxiagorekin; Bizkaian, ostera, 2.454 langabe gehiago eta Gipuzkoan 1.128 gehiago zenbatu dituzte. 2023ko urtarrileko datuekin alderatuta, aldiz, hiru lurraldeetan egin du behera langabeziak: 939 langabe gutxiago zenbatu dituzte Araban, 399 gutxiago Bizkaian eta 338 gutxiago Gipuzkoan.

Sektoreka, langabeen kopuruak gora egin du pixka bat lehen sektorean; industrian eta eraikuntzan, aldiz, zertxobait egin du behera, eta nabarmen egin du behera zerbitzuen sektorean. Lan-merkatuan sartu diren aurreko enplegurik gabeko herritarren kopuruak gora egin du pixka bat.

Bestalde, Euskadik Gizarte Segurantzako 1.003.190 afiliatu zenbatu ditu urtarrilean, hau da, aurreko hilean baino 9.756 gutxiago (-% 0,96), Gizarte Segurantzako Ministerioak ostiral honetan argitaratutako datuen arabera.

Euskal Autonomia Erkidegoan, aldiz, 2023ko lehen hilabeteko datuekin alderatuta, 18.875 langile gehiago daude Gizarte Segurantzan afiliatuta, % 1,92 gehiago.

Foru Erkidegoan joera berdina izan da, 30.663 langabe zenbatu baitira, Lan eta Gizarte Ekonomia Ministerioaren mendeko Estatuko Enplegu Zerbitzu Publikoak emandako datuen arabera.

Zerbitzuetan, 21.080 pertsona zenbatu dituzte lanik gabe urtarrilean, 2023ko azken hilabetean baino 635 gehiago.

Industrian eta nekazaritzan, igoera txikiak izan dira, 19 langabe gehiago eta 7 gehiago zenbatu baitituzte, hurrenez hurren. Eraikuntzan, aldiz, 17 langabe gutxiago daude.

Eusko Jaurlaritzaren balorazioa

Eusko Jaurlaritzaren ustez, ohikoa da urtarrilean langabeziak gora egitea eta Gizarte Segurantzako afiliazioak behera egitea Gabonetako kanpainako kontratuen amaierak eraginda, baina Euskadin enplegua sortzen jarraituko dela uste du.

Idoia Mendiak zuzentzen duen sailaren arabera, "azken mendean urtarrilero gertatzen dena mantendu egiten da", urtarrilean eta abuztuan "langabezia handitu eta Gizarte Segurantzako afiliazioa jaitsi egiten baita".