Kutxabankek aurreikusi du hipoteka berrien kopurua % 9,7 jaitsiko dela 2023an Euskadin

Kutxabankek aurreikusten du 2023an hipoteka berrien kopurua % 9,7 jaitsiko dela Euskadin. Bilakaera horrek 2024an jarraituko duela iragarri du, baina intentsitate txikiagoarekin; jaitsiera "neurritsuagoa" izango da, % 3,5ekoa, eta 2025etik aurrera "pixkanaka" suspertuko da.

Horiek dira bankuak astearte honetan ezagutzera eman dituen ondorio nagusietako batzuk; Cepredek egindako ikerketa bati dagozkio, eta hipoteken merkatuaren bilakaera hobeto ulertzeko balio dute.

2023 eta 2024 urteetan eta 2025-2030 bosturtekoan sinatuko diren hipoteka berriei buruzko aurreikuspenak biltzen dituen txosten horren emaitzak Kutxabanken Bilboko egoitzan zehaztu dituzte Iker Arteagabeitia Kutxabankeko finantza-zuzendariak eta Julian Perez Madrilgo Unibertsitate Autonomoko Ekonomia Aplikatuko katedradun eta Cepredeko zuzendari nagusiak.

Zehazki, eta txostenak jasotzen duenez, kalkulatzen da aurten 2.641 hipoteka berri sinatuko direla Euskadin, % 9,7 gutxiago 2022an hitzartutako 22.867 hipoteken aldean. Aldiz, 2024rako 19.923 hipoteka sinatzea aurreikusi du; horiek, aldi berean, % 3,5eko jaitsiera ekarriko lukete 2023ko datuen aldean.

Arteagabeitiak azpimarratu duenez, "finantzaketa-kostuen hazkundeak bereziki eragiten dio kredituari, eta hurrengo ekitalditik aurrera egonkortu egin daitezke".

Urtea ixtean Euskadin eratutako hipoteka kopuruaren jaitsiera konparatuta, Kutxabankek enkargatutako txostenak egiaztatzen du bilakaera horrek "pixka bat" hobetzen duela Espainiako merkatuaren batez bestekoa, % 11,4 jaitsiko baita bertan ekitaldi honen amaieran.