Ekonomia -
BPG
Laboral Kutxak 2023rako % 1,7ko hazkunde tasa aurreikusi du EAEn, eta % 1,5ekoa Nafarroan
Erakunde horrek egindako Euskal Ekonomiaren Txostenak ondorioztatzen duenez, bereizi egin behar dira zerbitzuen eta industriaren sektoreak, ahulezia nabaria baita azken horretan.
Agentziak | EITB Media
Laboral Kutxaren aurreikuspenen arabera, 2023an % 2ko hazkunde tasa izango da Espainiako Estatuan, % 1,7koa Euskal Autonomia Erkidegoan (EAE) eta % 1,5ekoa Nafarroan, erakunde horretako Ikerketa Zerbitzuak egindako Euskal Ekonomiaren Txostenak jasotzen duenez.
Ostegun honetan argitaratutako dokumentuak erakusten du joan den abenduan egindako aurreikuspena nabarmen hobetu dela.
Aurreikuspen berriek kontuan hartzen dute orain arte, 2023ko hilabeteetan, ekonomiak "indar erlatiboa erakusten jarraitzen duela", nahiz eta beharrezkoa izan "industria sektorea (ahulezia nabari da) eta zerbitzu sektorea (jarduera maila nabarmena du) bereiztea".
2022ko ekitaldiari dagokionez, dokumentuak gogorarazten du "Ukrainaren eta Errusiaren arteko gerraren hasierak markatutako urtea" izan zela, inflazioa izan zelarik "protagonista".
BPGaren portaerari dagokionez, testuak gogorarazten du EAEn iaz % 4,4 igo zela, Nafarroako (% 4,3) eta Estatuko (% 5,5) hazkundeekin bat etorrita.
Txostenak gogorarazten du, halaber, langabezia tasa % 8,6koa izan zela Euskadin, 2021arekin alderatuta, 1,2 puntuko jaitsiera izan duela. Indize hori % 9,6koa izan zen Nafarroan (% -1) eta % 12,9koa Espainian (% -1,9).