Ekonomia -
renfe abonuak
Indarrean sartu dira Renferen doako abonu berriak
Renfeko trenetan doan bidaiatu ahal izateko titulua lau hilabeterako da; ondorioz, berritu egin behar da. Lehen lauhileko honetan, 2,26 milioi abonu eskatu dira.
eitb media
Renfek ohiko bidaiarientzat eskaintzen dituen bigarren lauhilekorako doako abonuak gaur, maiatzak 1, sartu dira indarrean. Lehen lauhilekoko abonuak atzo, apirilak 30, iraungi ziren; beraz, abuztuaren 31ra arte Renferen Aldiriko, Rodalieseko eta Distantzia Ertaineko trenetan doan bidaiatzen jarraitzeko, berria atera beharko da.
Orain arteko funtzionamendu bera izango du: doako abonuak izan arren, erabiltzaileak 10 euroko fidantza ordaindu beharko du Aldirietako eta Rodalies zerbitzuetarako eta 20 euro Distantzia Ertaineko trenetarako. Abonuaren lau hilabeteko epea amaitzean, automatikoki itzuliko da fidantza, betiere erabiltzaileak gutxienez 16 bidaia egin baditu.
Gaur-gaurkoz, doako 250.000 abonu baino gehiago atera dira bigarren lauhilekorako: Aldirietako zerbitzuetarako 150.000 eta Distantzia Ertaineko trenetarako 100.000.
Nola lortu?
Abonu hauek Renferen webgunean, aplikazioan edo geltokietan bertan lortu daitezke.
2,26 milioi abonu lehen lauhilekoan
Renfek Aldiriko, Rodalieseko eta Distantzia Ertaineko doako 2,26 milioi abonu eta % 50eko hobaria duten Avant abonu eman ditu 2023ko urtarrilaren 1etik apirilaren 30era arte.
Lehenengo lau hilabeteetan erabili diren abonu guztietatik 1,6 milioi Aldiriko eta Rodalies zerbitzuetakoak dira, 537.000 abonu inguru Distantzia Ertainekoak, eta 118.000, berriz, % 50eko hobaria duten Avant abonuenak.