Reala, Europa Ligako final-zortzirenetarako txartelaren bila

Realak Midtjyllanden aurka jokatuko du, gaur, otsailaren 20an, Europa Ligako final-hamaseirenetako itzuliko partida. Joaneko neurketan, Danimarkan, txuri-urdinak nagusitu ziren (1-2). Donostiako taldeak gol bateko abantaila du, eta huraxe baliatzen saiatuko da final-zortzirenetara sailkatzeko.

Martin Zubimendik eta Jon Mikel Aramburuk ezingo dute jokatu, txartel horiak pilatzeagatik neurketa bateko zigorra bete behar dutelako; horrez gain, Jon Pacheco eta Hamari Traore min hartuta daude.

Midtjyllandek lana eman zion Realari joaneko norgehiagokan, eta partidako une batzuetan estu hartu zuen talde txuri-urdina. Danimarkako taldeak iragan asteburuan berrekin zion liga txapelketari, neguko atsedenaldiaren ostean, eta ezustekoa ematea izango du helburu. Midtjyllandek inoiz ez du lortu final-zortzirenetara sailkatzea Europako txapelketetan, eta muga hori gainditzen saiatuko da.

Izan litezkeen hamaikakoak:

Reala: Marrero; Aritz, Zubeldia, Aguerd, Javi Lopez; Olasagasti, Marin, Brais Mendez; Kubo, Oyarzabal eta Sergio Gomez.

Midtjylland: Lössl; Andersson, Diao, Bech, Paulinho; Castillo, Silva, Sørensen edo Byskov; Osorio, Buksa eta Simsir.

Epailea: Serdar Gözübüyük (NED).

Estadioa: Reale Arena.