Amorebieta eta Tudelano Kopatik kanpo geratu dira jipoiak jasota

Amorebieta eta Tudelano Errege Kopatik at geratu dira ostegun honetan jokatu duten lehen kanporaketan. Talde bizkaitarrak porrot egin du Barbastroren zelaian, bigarren zatian jipoia jasota (4-0), eta nafarrak 0-2 galdu du Deportivo Mineraren aurka Tuteran.

Huescan jokatutako partidan, Amorebietak eta Barbastrok lehen zati oso parekatua jokatu dute. Bi taldeek aurkariaren areara hurbildu dira, baina ez dute arrisku larririk sortu ate aurrean.

Aitzitik, bigarren zatia beste istorio bat izan da, Amorebietaren zoritxarrerako. Etxeko taldeak aurrea hartu du Adria de Mesaren golari esker, eta hortik aurrera Barbastro nagusi izan da bigarren zati osoan. Hamar minutura, Andres Barrerak bi gol sartu ditu jarraian, bigarrena penaltiz, eta Mesak berak sartu du partidako azken gola.

Horrela, Amorebieta txapelketatik kanpo geratu da jipoia jasanda.

Zorte bera izan du Tudelanok, baina ez du aukerarik izan Deportivo Mineraren aurka. Beltranek eta Britosek aurretik jarri dituzte Cartagenakoak ordu erdirako (0-2).

Bigarren zatian gauzak okerrera besterik ez du egin. Tuterakoek gutxiago izaten jarraitu dute jokoan eta ez dute kanporaketa irabazteko tekla eskuratu. Verak, Perdomok eta Chuecosek sartu dituzte bigarren zatiko hiru golak (0-5).