Alderdiek ekainaren 8ra arteko epea dute zerrendak aurkezteko

Uztailaren 12an Eusko Legebiltzarrerako hauteskundeetan parte hartuko duten alderdi politikoek gaur hasi eta datorren astelehenera bitartean aurkeztu ahalko dituzte euren zerrendak, Eusko Jaurlaritzaren Segurtasun Sailak jakinarazi duenez.

Arabako, Bizkaiko eta Gipuzkoako hauteskundeetan parte hartu nahi duten alderdi politikoek, federazioek, koalizioek eta hautesle-elkarteek epe horretan aurkeztu beharko dute beharrezko informazio guztia hiru lurralde historikoetako hauteskunde batzordeetan.

Hautagaien zerrendak ekainaren 10ean argitaratuko dituzte Euskal Herriko Agintaritzaren Aldizkarian. Ondoren, lau eguneko epea irekiko dute irregulartasunak zuzentzea eskatzeko. Behin betiko zerrenda ofizialak ekainaren 15ean ezagutuko dira eta biharamunean argitaratuko dituzte Agintaritzaren Aldizkarian.

Uztailaren 12ko hauteskunde prozesuari buruzko informazio guztia hauteskundeak.eus atarian dago eskuragarri.