Jaurlaritzak kontsultarako foro bat sortu du, etxebizitza babestuetarako lurzoruak "dinamizatzeko" asmoz

Eusko Jaurlaritzak dekretu bidez onartu du Hirigintza eta Etxebizitza Foroa sortzea. Kontsultarako eta parte hartzeko elkargune horrek eragile publikoak, pribatuak eta sozialak bilduko ditu etxebizitza-politikak diseinatu eta ezartzeko, Euskal Autonomia Erkidegoko (EAE) etxebizitza babestuetarako lurzoruen kudeaketa "azkartzeko eta dinamizatzeko" asmoz.

Eusko Jaurlaritzaren Kontseiluak astearte honetan onartu du foro hori sortzea, eta 54 kide izango ditu: Jaurlaritzaren eta udalen ordezkariak, bai eta sektore pribatu eta hainbat elkarte eta herritarren kolektiboen ordezkariak ere.

Denis Itxaso Etxebizitza sailburuak Gobernu Kontseiluaren osteko prentsaurrekoan azaldu duenez, foroa urtarrilaren 22an bilduko da estreinakoz, Bilbon, eta lehen hitzordu horretan jorratuko den lehenengo ekimenetako bat babestutako etxebizitzetarako lurzoruen kudeaketa "azkartzeko eta dinamizatzeko" neurriekin lotuta dago.

Alde horretatik, Itxasok esan du 2006ko Lurzoru eta Hirigintza Legearen eraginkortasunaren azterketak egungo arau-esparrua berrikustea planteatuko duela, prozeduretan etxebizitza babestua "malgutasun eta azkartasun handiagoz" bultzatzeko.

Foroak proposatuko du, halaber, tentsionatuko eremuetan lurzorua lagatzeko ekimenak aztertzea eta "etxebizitza babestuetarako sailkatutako lurzoru publiko eta pribatuen mapa zehatza egitea, lursail horien egoera eta ezaugarriak identifikatzeko".

"Etxebizitza duina bermatzeko erronkak eskaintza aktibatzea eta eskura dauden baliabideak, hala nola lurzorua hobeto kudeatzea, konbinatu behar ditu nahitaez", azpimarratu du sailburuak.

Lankidetza publiko-pribatua bultzatuko da, akordioak lortzeko hainbat mekanismo bilatzeko, adibidez, Europako Inbertsio Bankuarekin.

Bilboko manifestazioa

Joan den asteburuan Bilbon etxebizitza eskubidea berma dadila eskatzeko egindako manifestazioari dagokionez, Itxasok protestari "errespetua" azaldu dio, eta Eusko Jaurlaritzak egoerari aurre egiteko eta sektore guztiekin lan egiteko duen konpromisoa berretsi du.

2025ean EAEko hiru hiriburuetan eta, besteak beste, Barakaldo eta Irunen etxebizitzak alokatzeko tentsionatutako eremuen figura aplikatzea aurreikusten dela azpimarratu du, "maizterrak babesteko".