Parte hartzerako azken deia egingo dute euskal alderdiek, kanpainaren itxieran

Euskal alderdiek Bilbo eta Gasteiz hautatu dituzte Europako hauteskunde kanpainari amaiera emateko eta parte hartzerako azken deiak egiteko. EAJk eta Sumarrek Bizkaiko hiriburuan egingo dituzte itxiera mitinak, eta EH Bilduk, PSE-EEk eta PPk, Gasteizen. 

Boto-emaileak —ia 1,8 milioi herritar EAEn— konbentzitzeko azken eguna dute indar politikoek, Europako bozetan parte hartzearen portzentajea igotzeko asmoz —beste hauteskunderik ez badago, % 40koa izan ohi da—. Mobilizazioa gako da hauteskundeotan, eta barruti bakarrekoak izanda (Estatu mailakoa), EH Bildu eta EAJ Estatuko beste alderdiekin batera koalizioan (Orain Errepublikak eta CEUS, hurrenez hurren) aurkeztu behar dira eserlekua eskuratu ahal izateko. 

EAJk Arriaga plazan egingo du kanpainako itxiera ekitaldia (20:00etan), Oihane Agirregoitia EAJko eta CEUS koalizioko zerrendaburua protagonista dela. Ondoan izango ditu Andoni Ortuzar EAJren EBBko presidentea, Iñigo Urkullu lehendakaria, Izaskun Bilbao europarlamentaria —haren lekua hartuko du Agirregoitiak, eserlekua eskuratzekotan— eta Rakel Molina, Aitana Agirre eta Amaia Arrizabalaga hautagaiak. Jean Telletxea Ipar Euskal Herriko hautagaia ere ekitaldian izango da. 

Gasteizko Buruileria plaza (euria eginez gero, Artium) aukeratu du EH Bilduk azken mitinerako (20:30ean). Pernando Barrena EH Bildu eta Orain Errepublikak koalizioko hautagaiak hitzartea egingo du, baita Arnaldo Otegi koalizioko koordinatzaile nagusiak eta Barkartxo Ruiz hautagai nafarrak ere. 

PSE-EEk ere Arabako hiriburuan egin du hitzordua, baina Canciller Ayala hotelean, 18:30ean. Idoia Mendia hautagaiak lagunduta jardungo du bertan, Eneko Andueza EAEko sozialisten idazkari nagusia eta Maider Etxebarria Gasteizko alkatea izango baitira ekitaldian. 

Ordu berean, Gasteizko Azoka Plazan, azken mitina egingo dute Carlos Iturgaiz eta Javier Zarzalejos PPko hautagaiek. Miguel Tellado popularrek Kongresuan duten bozeramailea joango da babesa ematera (goizean beste ekitaldi batean izango da, Bilbon). 

Azkenik, Andeka Larrea Sumarrek EAEn duen zerrendaburuak ekitaldia du goizean (11:00etan) Mariaren Bihotza plazan, Alba Garcia Sumarreko ordezkariak, Xabier Jimenezek (Ezker Anitza-IU) eta Carmen Muñozek (Berdeak-Equo) lagun dituena. Arratsaldean, 18:30ean, Sumarren egoitzan izango da Larrea, hauteslekuetan ahaldun izango direnekin. 

Podemosek ez du EAEn ekitaldirik aurreikusita gaurko, eta Madrilen du azken mitina, Ione Belarra eta Irene Montero hautagaiekin. 

Igandean, EAJk eta PSE-EEk Bilbon dituzten egoitzetan jarraituko dute hauteskunde gaua; PPk Bilboko Catalonia hoteletik egingo du. EH Bilduk Iruñea aukeratu du zereginotarako, eta Catedral hotelean egin du hitzordua.