Mundua -
Hondamendi Naturala
Laguntza humanitarioa Libiara iristen hasi da, eta hildakoak 7.000tik gora eta desagertuak 10.000 dira
Oraingoz ia 4.000 gorpu identifikatu dituzte, Daniel zikloiaren ondorioz hondatu ziren bi presak Derna hiria suntsitu ostean.
agentziak | eitb media
Munduko Osasun Erakundeak (MOE) bidalitako 29 tonako laguntza humanitarioa Libiara iritsi da, Bengazhi hirira. Dernan uholdeek kaltetutako 250.000 pertsona laguntzaz hornitzeko produktuak eraman dituzte.
MOEk Dubain (Arabiar Emirerriak) duen egoitzatik bidalitako laguntza oinarrizko sendagaiek, premiazko hornidura kirurgikoak, ekipamendu medikuak eta hilotzentzako poltsek osatzen dute, erakundeak zehaztu duenez.
MOEk azpimarratu du oraingoz 3.958 gorpu erreskatatu eta identifikatu dituztela.
Daniel zikloiak eragindako uholdeekin batera bi presa hondatu izanak 7.000 hildakotik gora, 10.000 desagertu eta 30.000tik gora desplazatu utzi ditu.
