Gizartea -
GERRA KOMERTZIALA
Hauek dira AEBren muga-zerga orokorrek gehien kaltetutako Euskadiko produktuak: ardoa, kontserbak eta esnekiak
Elikagaien eta edarien sektorea bakarrik aintzat hartuta, ardoa da, alde handiarekin, Euskadik Estatu Batuetara gehien esportatzen duen produktua, eta soilik iaz 35,5 milioi eurora iritsi ziren esportazioak.
AGENTZIAK | EITB Media
Ameriketako Estatu Batuek (AEB) Europar Batasuneko produktuei ezarriko dien % 25eko muga-zerga orokorrak eragina izango du Euskal Autonomia Erkidegoan ere. Elikagaien eta edarien sektoreari dagokionez, ardoa da Euskadik AEBra gehien esportatzen duen produktua.
Amaia Barredo Eusko Jaurlaritzaren Elikadura, Landa Garapen, Nekazaritza eta Arrantzako sailburuak eman ditu datuak, elikagaien eta edarien sektoreko industrietako arduradunekin Bilbon gaur goizean egindako bileran.
Iaz, 35,5 milioi euroko esportazioak egin zituzten ardo ekoizleek Estatu Batuetara, Barredo sailburuak emandako datuen arabera, eta, hortaz, "merkatu horretako nekazaritzako elikagaien EAEko produktu nagusia da".
Arrain kontserben sektorea arian-arian hazi da AEBrako esportazio-kopuruan, 4,6 milioi eurora iritsi arte. "Esnekiek, gaztak izan ezik, presentzia egonkorra dute AEBn, bolumen txikiagoarekin izan bada ere", azpimarratu du Barredok.
Bestalde, Barredo sailburuak Europar Batasuna kritikatu du muga-zergen aurrean "estatuak gehiago" defendatuko dituelakoan. Hori dela eta, Euskadiren antzeko eskualdeekin aliantzak egiteko beharra adierazi du.