Aro epela kostaldean eta hego-haize zakarrak eragindako abisu horia Bizkaian eta Gipuzkoan Errege bezperarako

Erregeen desfileek ez ezik, hego-haizeak ere lekua hartuko du gurean igande honetan; bereziki, mendebaldean eta mendi inguruetan nabarituko dira haize-ufadak. Halere, Bizkaian eta Gipuzkoan, haizeak gogor jotzen ez duen tokietan, abisu horia ezarriko dute 00:00etatik 12:00etara, eta Bizkaian, toki haizetsuenetan, asteleheneko 00:00ak arte egongo da indarrean abisua, orduko 100 kilometrorainoko haize-boladak izango baitira.

Hodeiak eta ostarteak tartekatuko dira zeruan, euria egiteko arriskurik gabe, eta egunaren bigarren partean zaparrada txikiren bat bota dezake. Tenperatura maximoak ez dira gehiegi aldatuko, baina litekeena da koska bat gora egitea. Horrela, 18 gradu inguru izango dira kostaldean, eta 12tik gertu barnealdean.

Astelehenerako, Errege egunerako, aldaketa dator. Goizaldean eta lehen orduetan, hego-mendebaldeko haize bortitza izango da oraindik; orduan neurtuko dira eguneko tenperatura altuenak. Egunak aurrera egin ahala, ordea, hoztera egingo du giroak, mendebalde ipar-ekialdeko haizea sartuko baita eta tenperaturek behera egingo baitute nabarmen. Zeruak, bestalde, lainotu egingo dira, eta erruz botako du euria, batez ere isurialde atlantikoan. Tenperatura hotzenak egunaren amaieran izango dira. Baliteke Araban eta Nafarroan, zein mendi inguruetan, izotza egitea. Elur-kota 1.800 metrotik 1.200era jaitsiko da.

Asteartean, fronte epel batek zeharkatuko du Euskal Herria, goizean goiz izotza eta lanbroa nagusituko badira ere. Hego-haizea ez da arratsaldera arte helduko. Euria ere egin lezake.