Gizartea -
Abisu meteorologikoa
Abisu horiak ezarriko dituzte asteburuan, prezipitazio handiengatik
Larunbateko 15:00etatik gauerdira, lurralde osoan izango da abisu horia, 15-20 litro pila bailitezke ordubetean, eta ekaitzak lehertu eta txingorra egin lezake, barnealdean bereziki. Igande goizaldean, kostaldean izango da prezipitazio handiena, eta 40-50 litro ere pila litezke zenbait lekutan.
EITB Media
Abisu horiak ezarriko dituzte Euskalmetek, Aemetek eta MeteoFrancek asteburuan, euri handia izateko arriskuagatik.
Larunbatean, abisu horia izango da Hegoaldean 15:00etatik gauerdira, prezipitazio handiagatik; ordubetean 15-20 litro pila litezke. Zaparrada ertainak botako ditu, eta baliteke zenbait tokitan handiak eta trumoitsuak izatea, baita txingorra botatzea ere.
Larunbatean, ekaitz arriskua handiagoa izango da, arratsaldean barnealdean eta azken orduetan kostaldean bereziki.
Meteo Francek ere abisu horia iragarri du Ipar Euskal Herrirako, larunbateko 16:00etatik aurrera, ekaitzak espero baitira. Igande goizean ere jarraituko dute zaparrada trumoitsuek.
Larunbatetik iganderako gauean botako du gehien, eta ez da baztertzen ordubetean 40-50 litro ere botatzea zenbait lekutan.
Igandean, EAEn 09:00ak arte izango da prezipitazio handiak izateko arriskua. Zaparrada ertainak izango dira, eta zenbait tokitan handiak eta trumoitsuak, isurialde atlantikoan eta ekialdean gehienbat.
Nafarroan, eguerdira arte luzatu du Aemetek abisu horia, goizean euria egingo baitu, eta ordubetean 40 litroraino pila daitezkeelako zenbait tokitan.