Artikutzako urtegiaren zati bat eraisteko tramitazioek aurrera jarraitzen dute

Nafarroan, Artikutzako presaren zati bat eraisteko proiektuan beste aurrerapauso bat eman dute, Trantsizio Ekologikorako Ministerioaren ingurumen-inpaktuaren aldeko txostena jaso baitu Donostiako Udalak.

Ministerioak Artikutzari buruz emandako ebazpenaren arabera, ez da beharrezkoa proiektuaren inguruko ingurumen ebaluazio arrunta egitea, ez baita aurreikusten ingurumenean eragin kaltegarri esanguratsurik izango duenik, betiere aurkeztutako ingurumen agirian ezarritako neurriak eta ebazpenean aurreikusitakoak betetzen badira.

Testuinguru horretan, beraz, aurrera doa ekimena, eta Udaletik adierazi dutenez, orain proiekturako aurreikusitako lanak baimendu behar dira, eta, horretarako, presen segurtasunari buruzko txostena egin beharko du Kantauriko Konfederazio Hidrografikoak.

2019tik hutsik

Enobietako presa Donostia hornitzeko eraiki zen, baina 2016. urteaz geroztik ez da erabiltzen. 2019az geroztik hutsik dago, eta, ondorioz, Enobieta ibaiak jatorrizko bidea jarraitzen du orain, eta landaredia nabarmen hazi da lehen urez beteta zegoen eremu zabalean.

Udalak hiru aukera aztertu ditu Artikutzako presaren harira: presa bere horretan uztea, osorik eraistea eta eraisketa partziala egitea, eta hirugarrenaren alde egin du, ingurumen ikuspegitik jasangarriena delakoan.

Horrela, arrainek ibaiko kilometro gehiago zeharkatu ahalko dituzte, presan pilatzen diren sedimentuak ibaian behera joan ahalko dira eta arroetako jatorrizko morfologia berreskuratuko da eta inguruko faunaren zein landarediaren habitata egonkortu eta hobetuko da.

Nola egingo da eraisketa partzial hori?

Eraisketa partzialarekin, presaren ezkerreko gainezkabidean zazpi metroko zabalerako eskotadura bat irekitzea aurreikusten da. 3.930 metro kubiko hormigoi eraitsiko lituzkete, presa osorik eraitsita aterako luketenaren baino hamar aldiz gutxiago (39.374 metro kubiko).

Eraisketa partzialetik aterako duten hormigoi gehiena urtegi zaharrari buelta ematen dion pista hobetzeko erabiltzea aurreikusten du udalak.

Urtegia desegitea erronka handia da bai ingurumenaren aldetik baita ingeniaritzarako ere eta Europako funtsekin finantzatutako Life Kantauribai proiektuaren baitan dago; ibaiak berrezartzea du xede proiektu horrek.