Gizartea -
Euskadi Ikerkuntza Saria
"Ikerketa on" bat aurrera eramateko "elkarlana" aldarrikatu du Balluerkak
Lehendakariak 2021eko Euskadi Ikerkuntza Saria eman dio psikologo eta EHUko Psikologia Klinikoa eta Osasunaren Psikologia eta Ikerketa Metodologia saileko katedradunari.
Agentziak | EiTB Media
Iñigo Urkullu Eusko Jaurlaritzako lehendakariak 2021eko Euskadi Ikerkuntza Saria eman dio astearte honetan Nekane Balluerka psikologo eta Euskal Herriko Unibertsitateko (EHU) Psikologia Klinikoa eta Osasunaren Psikologia eta Ikerketa Metodologia saileko katedradunari.
Balluerkaren lanaren sendotasunetako bat estatistika datuetan "hanka-sartzeak" saihestea eta esku-hartze programak sortzea izan da. Katedradunak azpimarratu duenez, "testuinguru esnagarri" bat izatea eta "elkarlana ikerketa on" bat aurrera eramateko beharrezko osagaiak dira.
Lehendakaritzaren egoitzan egin da ekitaldia, Gasteizen, eta han izan dira Jokin Bildarratz Hezkuntza sailburua, Adolfo Morais Unibertsitate eta Ikerketa sailburuordea eta Amaia Esquisabel Ikerketa zuzendaria ere, besteak beste.
Balluerkak nabarmendu duenez, ikertzaile lanean, datuetan "hutsegiteak eta okerrak" saihesten saiatu da, biztanleriaren egoera psikologikoan "bidegabekeriarik" ez egiteko.
Balluerkari saria eman ondoren, lehendakariak nabarmendu du ikertzaileak eta katedradunak, egiteke dauden "hiru trantsizioei" heltzeko, "digitala, berdea eta soziala", "bikaintasunaren ikerketa eskolak" izateko "xedean bultza egin" duela.
Jokin Bildarratz Hezkuntza sailburuaren ahotan, Balluerkaren lana "gizartearen ebaluazioan arrasto sakona uzten ari da".
Nekane Balluerka Lasa irakasleak (Ordizia, Gipuzkoa, 1966) ekarpen nabarmenak egin ditu Diseinuen eta Datuen Analisiaren arloan, Gizarte eta Osasun Zientzietan ikerketak burutzeko, bai eta neurketa tresnak kultura artean egokitzeko metodologiaren arloan ere.