Espetxeratu egingo dituzte Barakaldoko sexu-erasoko bi atxilotuak

Barakaldon, emakume batek astelehen gauean jasandako sexu-erasoagatik atxilotutako 19 eta 20 urteko bi gizonak espetxeratu egingo dituzte epailearen aginduz.

Astelehenean, azaroak 4, jazo zen eraso matxista, Barakaldoko etxe batean. Dena dela, biktimak asteazkenean jarri zuen salaketa, eta Ertzaintzak ikerketa abiatu zuen ustezko erasotzaileak atxilotzeko asmoz. Hain justu, atzo goizean atxilotu zituzten eraso matxistaren ustezko egileak.

Barakaldoko epaitegi batean adierazpenak egin ondoren, epaileak kartzela zigorra ezarri du bi gazteentzako.

Barakaldoko mugimendu feministak, erasoa salatzeko elkarretaratzea egin zuen atzo, Herriko Plazan, eta ehunka herritarrek bat egin zuten erasoa gaitzesteko protestarekin.

1:28

Bestalde, Barakaldoko Udalak iragarri du herri-akusazio gisa aurkeztuko dela auzian.

Amaia del Campo alkateak Zigor Kodea eguneratzeko eskatu du, "emakumeen aurkako delitu higuingarri horiek merezi duten zigorra jaso dezaten". Alkateak Bozeramaileen Batzordea deitu du, eta bertan adierazpen instituzional bat onartu dute, baita mugimendu feministak gaur arratsaldean deitutako elkarretaratzea babestu ere.

Del Campok esan du dei egin nahi diela "astelehenetik aurrera gobernu gisa eratzeko betebeharra duten Madrilgo politikariei", eta eskatuko liekeela "lehen zeregin gisa jar dezatela Zigor Kodearen eguneraketa, emakumeen aurkako delitu higuingarri horiek merezi duten zigorra jaso dezaten".

Alkatea Clara Campoamor elkartearekin harremanetan jarri da, prozeduran "eskutik helduta joateko".