Gomazko ahateek lasterketa egin dute Iruñean gaitz neurologikoen ikerkuntzaren alde

Igande honetarako aurreikusita zegoen "Estropatada" ekimen solidarioa aldatu behar izan dute Iruñean, atzoko ekaitzaren ondorioz, Arga ibaiaren ur-goraldia izan baita hainbat puntutan.

Dena dela, hainbat proba egin dituzte Arga ibaian, Runako parkean, alegian. Ibaira bota dituzte, eta lasterketa abiatu da. Dozenaka piraguista izan dira ibilbidean zehar, ahateak gordetzen.

Plastikozko ahate horiek salgai egon dira aurreko asteetan, eta gaitz neurologikoen ikerkuntzarako dirua biltzea izan du helburu.

Iruñean egindako Estropatadaren lehenengo edizioa izan da gaurkoa. Ekimen solidario hori Bilbon jaio zen duela sei urte, eta orain urtero antolatzen du WOP Fundazioak.

Arga ibaiaren eta Runako parkearen inguruan, gainera, zuzeneko musika-emanaldiak, haurrentzako jolasak, gastronomia, sariak eta sorpresak izan dira goiz eguzkitsuan zehar.

WOP Fundazioak Bilboko lasterketarako ahateak erabili dituzte, eta lasterketa amaitzean, guztiak jaso dituzte, ibaia guztiz garbi utzita, ekimenaren antolatzaileek ohar baten bidez jakinarazi dutenez.