Garay Recubrimientos zigortu dute amiantoak gaixotutako langile baten heriotzagatik

Amiantoa arnasteagatik biriketako adenokartzinoma baten ondorioz hil zen langile baten emazteari 420.346,85 euroko kalte-ordaina ematera zigortu dute Garay Recubrimientos Bizkaiko enpresa, ASVIAMIE, Euskadiko amiantoaren biktimen elkarteak jakitera eman duenez.

Bilboko Lan Arloko 1 zenbakiko Epaitegiak 90.450,56 euro ordaintzera behartu du enpresa, senide bat galtzeagatik sortutako kalte moralagatik. Gainera, 329.896,29 euroko kalte-ordaina ematera behartu du, Fernando G. Z.-k jasandako ondorioengatik; izan ere, amiantoak eragindako laneko gaixotasun baten ondorioz hil zen.

1974ko urritik 2018ko maiatzera arte Productos de Goma Garay SA enpresan lan egin zuen langileak, ondoren Garay Recubrimientos SL enpresa bihurtu zena. Urtebete geroago hil zen, 64 urte zituela. Biriketako adenokartzinoma diagnostikatu zioten Gurutzetako Ospitalean 2017ko irailean egindako biopsia-txostenaren arabera.

Gainera, Gizarte Segurantzako Institutu Nazionalak ezintasun iraunkor absolutua aitortu zion gaixotasun profesional baten ondorioz.

ASVIAMIEk jakitera eman duenez, hildakoak amiantozko eta uralitazko plantxekin lan egiten zuen, eta "kontrolik gabeko gehiegizko esposizio etengabea izan zuen" material horren zuntzekin, "enpresak osasunerako arrisku larria ebaluatzeko edo mugatzeko inongo neurririk hartu gabe".

Epaian frogatuta geratu da langileak amiantoaren eraginpean lan egin zuela urteetan zehar, eta enpresak 1982. urteaz geroztik indarrean zegoen segurtasun eta higieneari buruzko legea ez zuela aplikatu. Horretaz gain, Garay Recubrimientos zigortzen duen beste epai bat ere badagoela dio ebazpenak, EAEko Justizia Auzitegi Nagusiak berresten duena, amiantoarekin kontaktuan egondako beste langile baten heriotzaren harira.