Eusko Jaurlaritzak ia 600 milioi euroan murriztu du bere zorra

Eusko Jaurlaritzak baimena eman du zor publikoko 597 milioi aurrez amortizatzeko; horietatik 521,5 Administrazio Orokorrari dagozkio, eta 75,5 Alokabide etxebizitza alokatzeko sozietate publikoaren maileguei.

Eragiketa hori urrian iragarri zuen Pedro Azpiazu Ogasun eta Ekonomia sailburuak, eta urtea amaitu baino lehen zorpetzea 9.444 milioi eurotan uzteko asmoa azaldu zuen, Barne Produktu Gordinaren (BPG)% 12,3.

Josu Erkoreka Jaurlaritzako bozeramaileak astearte honetan Gobernu Kontseiluaren ostean emandako prentsaurrekoan azaldu duenez, zorraren amortizazioa posible izan da "kontu publikoen exekuzio zorrotzari esker".

"EAEren kaudimena egiaztatuta dago", esan du Erkorekak, eta gogorarazi du Euskadi dela Estatuan gutxien zorpetu den autonomia erkidegoa.

Etorkizunari begira, Eusko Jaurlaritzak zorraren eta defizitaren helburuak eta gastu-araua betetzen jarraituko du, eta "gako berak" mantenduko ditu: "Kudeaketan zorroztasuna, hartutako konpromisoak betetzea eta aurrekontuen oreka", esan du bozeramaileak.