Ekonomia -
AURREIKUSPEN EKONOMIKOA
2016an 18.000 lanpostu sortuko direla aurreikusi du Confebaskek
Patronalaren arabera, ekonomiak 'hirugarren urtez errekuperazioaren bideari eutsiko dio'. Langabezia tasa % 13ra jaitsiko dela aurreikusi du enpresarioen elkarteak.
AGENTZIAK | ERREDAKZIOA
Confebask patronalak EAEko ekonomia 2016an % 2,6 haziko dela iragarri du; 18.000 lanpostu berri sortuko direla eta langabezia tasa % 13ra jaitsiko dela aurreikusi du patronalak.
Roberto Larrañaga Confebaskeko presidenteak eta Eduardo Arechaga zuzendari nagusiak aurkeztu dute, hedabideen aurrean, datorren urterako aurreikuspen txostena.
Ekonomiak "hirugarren urtez" errekuperazioaren bideari eutsiko diola esan dute. "Okerrena" pasatu dela, eta orain, errekuperazioa "egonkortzea" dela helburua esan du Larrañagak.
Confebasken arabera, Barne Produktu Gordinak % 2,7 egin du gora 2015ean, maiatzean egindako aurreikuspena betez. Gainera, susperraldi ekonomikoaren "erritmoa azkartzen" ari dela esan du patronalak, eta bide horretan, enpleguaren sorrera ere "indartzen" ari dela gaineratu du.
2015aren amaieran iaz baino 22.000 afiliatu gehiago izango ditu Gizarte Segurantzak, Larrañaren hitzetan.
