Alderdien arteko zerga-itunaz, kezka azaldu du SEAk

Alderdien arteko zerga-itunaz, kezka azaldu du Arabako patronalaren idazkari nagusiak, Juan Ugartek, Radio Euskadin egindako elkarrizketan. Bere ustez, “esnerik ez duen behi bat jezteko tentazioa" baitago horren atzean, enpresei zergak igotzearena hain zuzen.

Euskal Alderdi Jeltzalearen eta Alderdi Sozialistaren arteko zerga-itunaz, epe motzera baino epe luzera begiratu behar dela esan du, fiskalitatean aldaketak egiterakoan.

Alderdi Popularrak Arabako lurraldean zergen jaitsiera proposatuko omen duen ez dakiela gaineratu du Ugartek, baina, hiru lurraldeen artean harmonizazio fiskala egotearen garrantzia azpimarratu du.

Halaber, administrazio ezberdinek eta alderdi politikoek, enpresaburuen elkarteak, ekonomia eta fiskalitate politikaren inguruan egindako bileretara deitu ez izana deitoratu du.

Gobernua prestatzen ari den pentsioen erreformaren inguruan, bestalde, eztabaida zabalik egon behar duela esan du, eta egungo sistema jasangaitza dela gaineratu du.

Abuztuan Espainian izandako langabezia tasaren jaitsieraren inguruan, albiste ona dela esan du baina, era berean, Gizarte Segurantzan afiliatuta daudenen kopuruak behera egin duela nabarmendu du.