Aspek Iñigo Bikuñaga jarriko du Aitor Arangurenen ordez, azken jardunaldiari begira

Binakako Txapelketako final-laurdenetako ligaxkako azken jardunaldiari begira, Aspe enpresak erabaki tekniko bat hartu du: Altuna III.a-Aranguren bikotearen ibilbidea suspertzeko asmoz, Eibarko enpresak Aitor Aranguren kendu eta Iñigo Bikuñaren jarriko du azken jardunaldiari begira. Horrela, atzelari donostiarrak titular postua beteko du.

Igandean, Altuna III.ak eta Bikuñak Peña II.aren eta Albisuren aurka jokatuko dute Atano III.ean. Neurketa hori irabazten duena play-offerako sailkatuko da.

Imaz ere, baja

Ander Imazek minduta du eskuin eskua eta ez du jokatuko Binakako Txapelketako ligaxkako 14. jardunaldiko partida. Baiko Pilotak jakinarazi duenez, Iosu Eskirozek ordezkatuko du Oiartzungo pilotaria.

Hala, bada, Eskirozek Erik Jakarekin osatuko du bikotea otsailaren 14ko Aitor Elordiren eta Jose Javier Zabaletaren aurkako partidan. Sailkapeneko laugarren postua egongo da jokoan neurketa horretan. Elordik eta Zabaletak nahikoa dute 12 tanto egin ligaxka 4. postuan amaitzeko; 12 tanto baino gutxiago egiten badituzte, Jakarentzat eta Imazentzat izango da sailkapeneko 4. tokia.

Bi partidak zuzenean emango dituzte eitb.eus-ek eta ETB1ek.