Real Madrilek eta Manchester Cityk final-laurdenetarako txartelak eskuratu dituzte

Real Madrilek eta Manchester Cityk Txapeldunen Ligako final-laurdenetarako txartelak lortu dituzte astearte honetan, eta hurrengo faseko zozketan egongo dira Borussia Dortmund, Porto, PSG eta Liverpool taldeekin batera.

Alfredo Di Estefano estadioan jokatu dute Real Madrilek eta Atalantak final-zortzirenetako itzuliko partida (3-1). Benzemak sartu du 1-0ekoa 34. minutuan. Sergio Ramosek Real Madrilen bigarren gola sartu du, penaltiz. Azken txanpan, 82. minutuan, Murielek gol ikusgarria sartu du faltaz (2-1) Atalantarentzat, baina hurrengo jokaldian Asensiok neurketa guztiz erabakita utzi du (3-1). Joaneko norgehiagoka ere Real Madrilek irabazi zuen, 0-1eko emaitzarekin.

Astearteko final-zortzirenetako beste partidan Manchester City nagusi izan da Borussia Mönchengladbachen aurka (2-0). De Bruynek eta Gündoganek sartu dituzte Ingalaterrako taldearen golak. Joaneko neurketan Pep Guardiolak zuzentzen duen taldeak lortu zuen garaipena (0-2).