Politika -
Elkarrizketa Euskadi Irratian
Iriartek uste du erabakitzeko eskubideaz EAJrekin Gipuzkoan lortutako ituna "neutralizatuko" duela PSE-EEk
EH Bilduk Gipuzkoako Batzar Nagusietan duen eledunak salatu duenez, jeltzaleek eta sozialistek "bi gobernu baleude bezala" funtzionatzen dute. Zerga sistemaren erreforman Gipuzkoan erdietsitako adostasuna Araba eta Bizkaira zabaltzea nahi du Iriartek, "sistema justu eta progresiboa lortzeko".
Eider Garaikoetxea O. | EITB Media
Maddalen Iriarte EH Bilduk Gipuzkoako Batzar Nagusietan duen bozeramaileak nabarmendu duenez, erabakitzeko eskubideari buruz EAJrekin Gipuzkoan lortutako akordioa "neutralizatuko" du PSE-EEk, koalizio bazkideek "bi gobernu baleude bezala" funtzionatzen dutelako, hainbat gaitan "batak bestea neutralizatuta". Ondorioz, "puntu hil batean geratzen gara", kritikatu du.
Euskadi Irratiko "Faktoria" saioan elkarrizketatu dute gaur Iriarte, asteon Batzar Nagusietan Politika Orokorreko amaitu berritan. Jeltzaleek Estatus berriak izan beharko lituzkeenak adostea "erraza" izan dela aitortu du Iriartek, 2018tik jasota baitaude oinarriak —Eusko Legebiltzarrean horren inguruko adierazpena itundu zuten EH Bilduk eta EAJk— eta nazio aitortza eta erabakitzeko eskubidea, biak beharrezkoak direla gogorarazi du. Iriarteren esanetan, planteamendu hori aurrera ateratzeko "gehiengoak badaude Bizkaiko eta Arabako Batzar Nagusietan, Legebiltzarrean eta esango nuke, udal gehienetan".
Hori horrela, erakundeotan zentzu bereko adierazpenak ez onartzea "oso grabea" irudituko litzaiokeela azpimarratu du: "Inork ez du ulertuko, gero esaten dute politikarekiko desafekzioa dagoela (...) Zer da jokoan dagoena? Eserleku batzuk? Bada eserleku batzuengatik herri honek ez du aurrera egingo", salatu du.
(Informazioa osatzeko lanean ari gara)