Politika -
Azken Gobernu Kontseilua
Urkullu azken ekitaldi ofizialen buru izango da gaur Lehendakaritzan
12 urtez Eusko Jaurlaritzako buru izan ondoren, Urkulluk datorren larunbatean emango dio aginte-makila bere ondorengoari, Gernikako Juntetxean.
EITB MEDIA
Iñigo Urkullu lehendakaria bere azken Gobernu Kontseiluko buru izango da gaur, eta azken ekitaldi ofiziala Lehendakaritzan egingo du.
Asteartero bezala, Gobernu Kontseilua 10:00etatik 12:00etara izango da gutxi gorabehera, eta ordu batzuk geroago, Urkullu lehendakari gisa egingo duen azken ekitaldiko buru izango da Eusko Jaurlaritzaren Lehendakaritzaren egoitzan, Gasteizen. Azken ekitaldi ofiziala 'Euskadiko Gazteak Lankidetzan' programan parte hartuko duten pertsonei egingo zaien harrera izango da.
Eta asteazkenean, bere ondorengoaren, Imanol Pradales jeltzalearen, inbestidura saioaren aurretik egingo duen azken ekitaldi publikoa, Arrasateko osasun zentro berriaren lehen harria jartzea izango da.
Azkenik, ostegunean inbestidura saiora joan ondoren, datorren larunbatean, Gernikako Juntetxean, karguaz jabetu eta karguaren zina egingo du lehendakari berriak, eta aginte-makila emango dio Urkulluk.