Politika -
Hauteskundeak
Galdakao eta Usansolo batera agertuko dira apirilaren 21eko hauteskundeetako emaitzen zenbaketan
Espainiako Estatistikako Institutu Nazionalak hauteskunde-errolda abenduaren 1ean itxi zuenez, ezin izan du Usansolo Toki Erakundeen Erregistroan inskribatu. Udalerri hori independentea da abenduaren 22tik.
EITB MEDIA
Galdakaoko eta Usansoloko herritarrek apirilaren 21eko Eusko Legebiltzarrerako hauteskundeetan emandako botoak berriro batera zenbatuko dira, nahiz eta Usansolo abenduaren 22an eratu zen udalerri independente gisa.
Espainiako Estatistikako Institutu Nazionalak (INE) jakinarazi du hauteskunde-errolda abenduaren 1ean itxi zuela, eta, beraz, ezin izan duela Usansolo Toki Erakundeen Erregistroan inskribatu. Erregistro hori abenduaren 22an egin zuen Espainiako Gobernuak.
Galdakaoko Udaleko bozeramaile batek azaldu duenez, egungo hautesle-erroldarekin, Usansolorekin muga egiten duten eremuetan bizi diren herri horretako boto-emaile batzuek desanexioa egin aurretik egokitu zaizkien hauteskunde-mahaietan bozkatzen jarraituko dute.
