Guzan plataforma prest agertu da "Bermeoko gobernuari egonkortasuna emateko neurri guztiak hartzeko"

Bermeon, datozen orduetan ezagutuko da alkate berriaren izena. Izan ere, kargua hartu eta ordu gutxira Asier Larrauri alkateak dimisioa eman zuen, auto istripua izan eta baimendutako alkohol tasa gainditu ondoren.

Guzan herri plataforma independenteak ohar labur bat igorri zuen atzo gauean, Asier Larrauri alkate izateko EH Bildurekin sinatutako koalizio akordioa gogoratuz, eta, egoera ikusita, "Bermeoko gobernuari egonkortasuna emateko behar diren neurri guztiak hartzeko prest" dagoela adieraziz.

Gaurtik aurrera osatuko da Udal Gobernu Batzordea, eta "aipatutako akordioaren arabera, talde bietako zinegotzien funtzioak emateaz gain, Xabier Ortuzar Butron (Guzan) Bermeoko alkateorde" izendatuko dute.