Hauteskundeetara batera aurkezteko ituna xede, atzera kontaketan sartu dira Sumar eta ezkerreko indarrak

Azken txanpan. Sumar, Yolanda Diaz Espainiako Gobernuko presidenteorde bigarrenaren proiektua, eta Espainiako Estatuko ezkerreko indarrak atzera kontaketa sartu dira uztailaren 23ko hauteskunde orokorretan batera aurkezteko ituna ixten saiatzeko. Biharko 00:00ak arte dute epea, hauteskunde legeak koalizioei ezarritako muga kontuan hartuta. Podemos itunera bilduko ote den da zalantza handiena. 

Elkarrizketak abian daude, eta Sumarretik itxaropentsu agertu dira, 15 bat indarren arteko "puzzlea" osatzea zaila dela ohartarazi arren. Nabarmendu dutenez, ez dute "azken unera arte" itxaron nahi. 

Negoziazioen gertuko iturrien arabera, helburua da aurrena eskualdeko alderdi txikiekin akordioa ixtea, gero, Izquierda Unida batzea, eta azkenik, Podemosekin azken zertzeladak adostea. Hala, itunak egin dituzte jada Chunta Aragonesista alderdiarekin eta Drago Canarias proiektuarekin (Alberto Rodriguez Podemosen diputatu ohiarena). Mas Madriden militantziak Sumarren baitan joateari baiezkoa eman zion atzo, eta Equo Berdeak, IU eta En Comun Podem indarrek aspaldi adierazi zuten Diaz babesten dutela. 

Podemoseko eledunek batasunaren alde lanean ari direla eta batasun akordio bat nahi dutela azpimarratu dute. Dena dela, Pablo Echenique koalizio morearen Kongresuko bozeramaileak atzo ohartarazi zuenez, "berandu" ari dira.