Jose Guirao Kultura ministro ohia hil da 63 urte zituela

Jose Guirao Kultura eta Kirol ministro izandakoa Madrilgo bere etxean hil da 63 urte zituela, gaixotasun luze baten ostean. 2018an izendatu zuen Pedro Sanchezek Kulturako ministro, eta 2020ra arte bete zuen kargu hori.

Almeriako Pulpi herrian jaioa, Reina Sofia Arte Museoko zuzendari izan zen 1994. eta 2000. urteen artean, eta Montemadrid Fundazioan sartu zen 2001ean, La Casa Encendida izeneko zentro soziokultural berri baten irekieran lan egiteko.

2013an, Montemadrid Fundazioko zuzendari nagusi izendatu zuten, eta kargu hori bete zuen 2018ko ekainean Kultura eta Kirol ministro izendatu zuten arte. 2020an itzuli zen berriz ere fundaziora, baina 2021aren amaieran jakinarazi zion patronatuari Fundazioaren zuzendaritza utziko zuela.

Proiektu berezietarako aholkulari postutik, azken hilabeteetan, bere denboraren zati handi bat Madrilgo Kale Nagusiko Musika Jauregia berreskuratzeko proiektuari eskaini dio.

San Isidro beilatokia astelehen honetan 16:00etan zabalduko dute astearte eguerdira arte, eta, ondoren, erraustu egingo dute.