Politika -
Kartzela politika
ETAko beste hiru preso lekualdatuko dituzte euskal espetxeetara eta gertukoetara
Mikel San Sebastian Murtziatik Soriara eramango dute; Irkus Badillo, Alacantetik Basaurira; eta Aurken Sola, Burgostik Iruñera.
agentziak | eitb media
Espainiako Espetxe Zuzendaritzak ETAko beste hiru preso Euskal Herriko edo gertuko espetxeetara lekualdatzea erabaki du.
Murtziako espetxetik Soriakora eramango dute Mikel San Sebastian. 2008ko apirilaren 22an sartu zuten preso, hilketak egitea, talde armatuari laguntzea eta armak eta munizioa gordetzea leporatuta.
Alacantetik Basaurira joango da Irkus Badillo. 22 urteko kartzela-zigorra jaso zuen ETAko kide izateagatik, eta hirugarren graduan egongo da. Izan ere, zigorraren hiru laurdenak bete zituen 2019ko otsailean, ez du ardura zibilik, kartzela-legedia onartu du, ETArengandik urrundu da eta atsekabea agertu du biktimei egindako minagatik.
Era berean, 2008ko azaroaren 1ean espetxeratu zuten Aurken Sola ETAko presoak Burgosko espetxea utzi eta Iruñekoan jarraituko du zigorra betetzen. Zigorraren hiru laurdenak beteko ditu 2023ko urrian, kartzela-legedia onartu du, indarkeria errefusatu du eta idatziak bidali ditu biktimei enpatia erakusteko.
