Politika -
MANIFESTAZIOA
Gaixo dauden presoak askatzeko bide-orri adostua eskatu du Kalera Kalerak
'Kalera, bakea eta askatasuna irabaztera' lelopean, manifestazioa egin dute Donostian. Bake-bidean aurrera egiteko, sakabanaketa politika amaitzea ezinbestekoa dela esan dute.
AGENTZIAK | ERREDAKZIOA
Gaixo dauden presoak kaleratzeko bide-orri adostua aldarrikatu dute ehunka pertsonak Donostian. Kalera Kalera plataformak deituta, manifestazioa egin dute, 'Kalera, bakea eta askatasuna irabaztera' goiburupean.
"Bide-orri horrek aurreko fasea modu iraunkorrean eta egokian ixteko balio behar du. Helburu horren bidean, gure ahalegin zintzoena egin behar dugu, herri honetan ez delako benetako bakerik izango sufrimenduak irauten duen bitartean. Presoek, iheslariek eta deportatuek sufritzen jarraitzen dute", esan du Olaia Matxain plataformako kideak.
Sakabanaketa politika behin betiko amaitzea ezinbestekoa da, Kalera Kalera mugimenduaren iritzian, bake-bidean aurrera egiteko.
Manifestazioan, besteak beste, Rufi Etxeberriak eta Marian Beitialarrangoitia EH Bilduko kideek hartu dute parte.
