Israelek ez du Gazako Zerrendaren iparraldera konboi humanitario gehiago joaten utziko, gosetea egon arren

Philippe Lazzarini UNRWA Palestinako Errefuxiatuentzako Nazio Batuen Agentziako komisario nagusiak igande honetan jakitera eman duenez, Israelek Nazio Batuen Erakundeari jakinarazi dio ez duela onartuko Gazako Zerrendaren iparraldera doazen konboi humanitario gehiago.

"Gure zaintzapean gertatzen ari den tragedia gorabehera, Israelgo agintariek NBEri jakinarazi diote jada ez dutela UNRWAren elikagai konboirik onartuko iparralderantz", adierazi du Lazzarinik ohar baten bidez.

Goi ordezkariak gogorarazi duenez, UNRWAk ia 6 milioi palestinarri ematen die laguntza hainbat herrialdetan, eta Gazako Zerrendako eragile humanitario nagusia da. Gaza erasopean dagoen honetan, erakunde hau da 2 milioi desplazatu baino gehiagorentzat "sostengu nagusia" eta iparraldean "oinarrizko laguntza" eman dezakeen bakarra.

"Haserre izugarria eragiten du gizakiak eragindako gosete batean laguntza humanitarioa oztopatzea. Murrizketa horiek kendu egin behar dira", adierazi du Lazzarinik.

Gazako Zerrendara laguntza humanitario gehiago sartzea ahalbidetzeko nazioarteko presioa areagotzen ari den unean iritsi da albistea. Izan ere, Gazako biztanleen erdiak gosete arriskuan daude, NBEren txosten berri baten arabera.

Israelek ez du ezkutatzen UNRWA Gazako Zerrendatik kanporatu nahi duela. Hala, urtarrilean, Hamasekin lotura izatea egotzi zion UNRWAri, eta akusazio horren ondorioz, 18 herrialdek iragarri zuten beren funtsak erretiratuko zituztela ikerketa amaitu arte, diru-emaile nagusiek tartean (AEB, Alemania, Japonia eta Frantzia). Hori dela eta, 450 milioi dolarreko murrizketa izan du errefuxiatuak artatzeko laguntzetan.

Kanada, Suedia, Australia eta Europar Batasunak, baina, UNRWAren finantziazioari berrekiteko asmoa iragarri dute azken asteetan, Israelek aurkeztutako frogek sendotasunik ez dutela iritzita.

Beste herrialde batzuek, Espainiak, Norvegiak, Suediak, Danimarkak, Belgikak, Saudi Arabiak, Qatarrek eta Kuwaitek besteak beste, dirulaguntzei eutsi zieten, eta funts gehigarriak ere iragarri zituzten.

Guterresek ohartarazi duenez, "Apokalipsiaren lau zaldunak" Gazan daude orain

Antonio Guterres NBEko idazkari nagusiak Gazako Zerrenda jasaten ari den "hondamendi humanitarioa" salatu du gaur, berriz ere; izan ere, "badirudi Apokalipsiaren lau zaldunak sartu direla Gazara".

"Gerrako lau zaldunak (izurria, gerra, gosea eta heriotza) Gazan daude", adierazi du Guterresek El Arish hirian eskainitako prentsaurrekoan. Same Shukri Egiptoko Kanpo Arazoetako ministroarekin bildu da bertan.

Hori dela eta, Guterresek "berehalako su-eten humanitarioa" eskatu du beste behin.