Zazpi pertsona atxilotu dituzte Bulgarian, kamioi batean 18 migratzaile hilda aurkitu ostean

Gutxienez zazpi pertsona atxilotu dituzte joan den ostiralean Sofia Bulgariako hiriburutik gertu aurkitutako kamioarekin zerikusia dutelakoan; kamioian 18 lagun hilda aurkitu zituzten. 

NOVA agentziak jakitera eman duenez, Bulgariako Fiskaltza atxilotuak hilketagatik ala homizidioagatik inputatu aztertzen ari da, gau osoan kamioia aurkitu zuten lekuan ikerketak egin ostean.

Atxilotuen etxebizitzak miatu dituzte, eta beste pertsona batzuen bila ari dira, nahiz eta susmoa duten dagoeneko herrialdetik kanpo egon daitezkeela.

Kamioiak 52 pertsona zeramatzan, tartean haurrak ere bai. Bizirik atera direnak Sofiako ospitaleetara eraman dituzte, eta batzuk zainketa intentsiboetan daude.

"Etsita aurkitu zituzten, oxigenorik gabe, bustita, izoztuta eta goseak", deitoratu dute NBEko agentziek.

Hala ere, agintariek emandako "erantzun azkarra" goraipatu dute, "bai eta bizirik atera direnei laguntza eta arreta eskaini dieten ospitaleei ere".

"UNICEF, OIM eta ACNUR prest daude agintariei eta bizirik atera direnei laguntzeko, eta espero dute krimen latz horren erantzuleak berehala eramango dituztela justiziaren aurrera", gaineratu dute.